Палескія скарбы

Па балоцістай раўніне цячэ рака Арэса. Паабапал яе распасцёрся вялікі балотны масіў. Раней гэта быў глухі куток. Журботна шумеў трыснёг ля зарослых цвіллю ручаін, рачулак і азёрцаў. Багністыя вокны падсцерагалі жывёлу і чалавека. Селянін баяўся балот, ствараў легенды аб іх паходжанні.

Але прыйшоў час і пачалося наступленне на балота. Глыбокія каналы парэзалі балотныя абшары. Балоты пераўтварыліся ва ўрадлівыя палеткі і сенажаці. Палессе стала краем незлічонага багацця. На асушаных балотах зарунела збажына, павырасталі сады.