Дзень пачынаецца

Паружавеў усход. Схаваўся ў галінках дрэў туман. Пакацілася з лісточка на лісточак шэрая расінка.

Замігцелі апошнія зоркі. Прыціхлі ў хмызняках начныя цвыркуны. Усё жывое прачыналася пасля кароткай летняй ночы.

Вось падняўся з галінкі і паляцеў да свайго цёмнага дупла пугач. Усю ноч ён паляваў на мышэй і зайчанят. Спяшаецца пугач схавацца ад залатых сонечных праменяў.

Кажаны таксама хаваюцца ў цёмныя мясціны. Не любяць яны дзённага святла.

Але вось пачуўся тоненькі галасок нейкай птушачкі. За ім адазваўся другі. І напоўніўся лес незвычайнай музыкай.